Мөнхийн улсын өдрүүд газар дэлхий дээр: Өдөр 2

“Бурханы биднийг хайрладаг хайрыг нь бид мэдэж, итгэдэг. Бурхан бол хайр мөн. Хайрын дотор байгч нэгэн нь Бурханы дотор байж, Бурхан түүний дотор байна.” 1 Иохан 4:16

Христэд итгэгч хүний хамгийн гол чухал хүлээн авч, ойлгож ухааран, мэдэж мэдэрч, итгэж үнэмших ёстой зүйл бол “Бурхан бол хайр, Тэрээр намайг мөнхийн дуусашгүй хайраар хайрладаг” хэмээх үнэн юм.

Үнэн хэрэгтээ зөвхөн итгэгч хүний бус, харин бүх л хүн төрөлхтний мэдэх ёстой зүйл энэ мөн. Бурханы хайрыг хүмүүс бид амсаж мэдээгүйгээсээ болж амьдралдаа маш олон буруу сонголт шийдвэрүүдийг гаргадаг. Зөвхөн энэ хайрын дүүргэж чадах зүрх сэтгэлийн хоосон орон зайг бид янз бүрийн буруу зүйлээр дүүргэх гэж зогсолтгүй чармайдаг. Бүр ч их харамсалтай зүйл нь, бидний ихэнх нь өөрсдийн энэ хэрэгцээгээ тодорхойлж чадаагүй, мэдээгүй явсаар байдаг.

Христ итгэгчид бид “Бурхан надад хайртай, намайг хайрладаг” гэдгийг дан ганц оюун ухаандаа мэдэх нь хангалттай биш юм. Үүнийг бид зүрх сэтгэлийнхээ гүнд хүлээн авч, итгэж үнэмших хэрэгтэй. Тийм учраас Апостол Иохан дээрх ишлэлд “Бурханы биднийг хайрладаг хайрыг нь бид мэдэж, итгэдэг.” хэмээсэн. Учир нь Бурханы хайртай учирч, Бурханы хайрыг хүлээн авч, Бурханы хайранд итгэж үнэмшсэнээр бид энэ хайрын дотор амьдарч чадах бөгөөд Ариун Сүнсний хайр, амар тайван, баяр баясгалан, тэвчээр, өөрийгөө захирах чадвар зэрэг бүхий л сайн сайхан үр жимс бидний амьдралд хүчин чармайлт, хичээл зүтгэлгүйгээр аяандаа урган гарах боломжтой болдог.

Амьдрал асуудалгүй, бүх юм хүслээр сайхан байх үед Бурханы хайранд итгэж үнэмшин, бусдыг хайрлан, ерөөж амьдрах нь хялбар. Гэвч хэцүү асуудал, хүндрэл бэрхшээл тулгарах тэр үед ч бид Бурханы хайрыг дурсан санаж, итгэж үнэмших хэрэгтэй.

Хэдэн жилийн өмнө нэг найз маань “Би үргэлж уучлахыг сонгох болно” гэж хэлж билээ. Тэр үед би хувьдаа мөн адил “Их Эзэн минь миний бүх гэм нүглийг уучилж, надад хайраар тэвчээртэй ханддаг, тийм учраас би ч мөн үргэлж уучлахыг сонгох болно.” гэж шийдэж билээ.

Харин миний саяхан зүрх сэтгэлдээ Эзэнийхээ өмнө гэмшин шийдсэн өөр нэг зүйл бол “Би хэзээ ч дахин хэн нэгний, ялангуяа итгэлийн ахан дүүсийнхээ талаар сөрөг үг яриа,хов жив ярихгүй” гэсэн нь юм. Бидний эргэн тойрон, нийгэмд болохгүй бүтэхгүй, биднийг уурлуулж бухимдуулах зүйл олон бий. Гэвч энэ нь бусдыг муулах, тэдний талаар сөргөөр ярих шалтаг шалтгаан биш юм. Би Ертөнцийн Эзэнийхээ хайран дотор алхахыг хүсч байна. Учирч нь Түүний намайг хайрлах хайрыг би мэдэх бөгөөд энэ хайранд итгэдэг.

Энэ өдөр Бурханы таныг хайрлах хайрыг мэдэж, итгэж үнэмшин, Түүний хайраар өөрийгөө болон өрөөлийг хайрлан амьдраарай!

Мөнхийн улсын өдрүүд газар дэлхий дээр: Өдөр 1

“Есүс бол Бурханы Хүү гэж хүлээн зөвшөөрдөг хэний ч дотор Бурхан байж, тэр Бурханы дотор байна.” 1 Иохан 4:15
Энэ үнэхээрийн гайхамшигт үнэн. Үүнээс бид 2 чухал зүйлийг сурч болно.

1. Бид Есүсийг Аврагч, Эзэн хэмээн зүрхэндээ итгэн, амаараа хүлээн зөвшөөрч тунхагласнаар зөвтгөгдөж, арвалд хүрдэг. Жинхэнэ зүрхэн дэх итгэл үргэлж гаднаа илэрхийлэгдэх үйлстэй байдаг. Биднийг авралд хүргэсэн итгэл бидний хүлээн зөвшөөрөн хэлсэн үг яриа, гуйлт, залбирал байсан. Ингэж бид дээрээс дахин төрж, шинэ сүнсийг хүлээн авч, цоо шинэ бүтээл болдог. Мөн бидний дотор бүтээгдсэн шинэ сүнс дотор амьд Бурханы Ариун Сүнс ирж нутагладаг. Эзэний Сүнстэй нэгдсэн сүнс НЭГ болой хэмээн Библи бидэнд заадаг. Өөрөөр хэлбэл, Христэд итгэгч бидний дотор амьд Бурхан Өөрийн Сүнсээрээ оршин байдаг. Мөн бид Амьд Бурханы дотор оршин байдаг. Учир нь бид Түүнтэй нэг болсон.

2. Есүсийг Бурханы Хүү гэж хүлээн зөвшөөрсөн нь нэг удаагийн үйлдэл бус, харин бидний амьдралын хэмнэл байх ёстой. Бид өдөр, цаг, минут, секунд тутамд Есүсийг Бурханы Хүү хэмээн хүлээн зөвшөөрөх ёстой. Учир нь ингэснээр бид өөрсдийн дотор буй амьд Бурханы амьдрал, мөн Түүн доторх амьдралаар амьдарч, бусдад Түүнийг гэрчилж чадна. Өөрөөр хэлбэл, дахин төрөхөд Бурхан миний дотор, би Түүний дотор болсон юм байна гэдгийг ойлгох, мөн яг одоо энэ цаг мөчид Бурхан миний дотор, би Бурханы дотор БАЙНА гэдгийг ухааран амьдрах хоёр ялгаатай юм.

“... та нар Эзэн Христ Есүсийг хүлээн авсан шигээ Түүн дотор алх...” (Колоссай 2:6) хэмээн Эзэний Үг бидэнд тушаадаг.

Есүсийг Бурханы Хүү гэж хүлээн зөвшөөрнө гэдэг нь бидний гэм нүгэл уучлагдсан, бид Христтэй хамт цовдогдон нас барсан, мөн Түүнтэй хамт дахин амилсан төдийгүй тэнгэрт өргөмжлөгдөн, тэнгэрлэг газарт суусан зэрэг үнэн баримтуудад итгэж үнэмшин, тэдгээрт захирагдан амьдрахыг хэлнэ. Энэ бүх зүйл Бурхан бидэнд хайртай, биднийг хайрладаг учраас бий болсон. Иймээс Есүсийг Бурханы Хүү гэж хүлээн зөвшөөрнө гэдэг нь Бурханы биднийг хайрлах хайрыг өөртөө сануулан, хүлээн авна гэсэн үг юм.

Хэрэв ээ та Христэд итгэгч хүн бол яг одоо энэ цаг мөчид Бурхан таны дотор, та Бурханы дотор байна. Тийм учраас ер бусын амьдрал тантай хамт байна. Үүнийг хүлээн авч Мөнхийн улсын өдрийг энэ газар дэлхий дээр өнөөдөр бий болгон амьдраарай.