ТАНЫ ХҮСДЭГ АМЬДРАЛ

2013 оны 3 сарын 16-ны өдрийн сургаалаас:

"Би бол Төгс Хүчит Бурхан.
Чи Миний өмнө явж, гэм зэмгүй байгтун." - Эхлэл 17:1

Энэхүү ишлэлийг олон удаа уншихдаа Их Эзэн маань намайг Өөрийнх нь өмнө гэм зэмгүй яваасай гэж хүсдэг юм байна. Гэвч би хэрхэн үүнийг хийх вэ гэж өөрөөсөө их асуудаг байж билээ. Учир нь бид төгс биш учраас алдаа эндэгдэл гаргадаг, гэм нүгэл үйлддэг. Мэдээж жинхэнэ дээрээс төрсөн Есүс Христэд итгэгч хүн гэм нүглийг байнга өөрийн хүсэл тэмүүлэлтэй санаатай үйлдэх нь үгүй. Учир нь бидний дотор бүрэн өөрчлөлт явагдсан. Бид Их Эзэнднээ таалагдан амьдрахыг эрмэлздэг. Харамсалтай нь, хааяа бид бүдрэх үе байдаг бөгөөд үүнээсээ болж Их Эзэнийхээ өмнө гэм зэмгүй алхаж чадахгүй байна хэмээн өөрсдийгөө харах үе зөндөө байдаг.

Харин Ариун Сүнс энэ ишлэлийг юу гэж хэлсэн болохыг нь харуулсан юм. Их Эзэн маань биднийг Өөртэй нь амар тайван эрүүл сайхан дотно харилцаатай байгаасай хэмээн хүсдэг. Гэвч үүнд саад болох зүйл нь бид өөрсдөө. Бид өөрсдийн гэм нүглээсээ, алдаа дутагдалаасаа болоод Их Эзэндээ ойртож чаддаггүй. Тийм учраас энэ ишлэлд Их Эзэн маань "Та нар гэм зэмгүй байж Миний өмнө алх" гэж хэлээгүй. Харин юу ч болж байсан Өөрийнх өмнө алх. Эзэн Бурхантай хамт алх. Учир нь ийнхүү Их Эзэнтэйгээ алхах үед Түүний мэлмийн өмнө бид гэм зэмгүй байдаг гэдгийг харуулж байна. Тиймээс "Чи Миний өмнө яв, тэгээд гэм зэмгүй бай" гэсэн.

Үнэхээр бид Шинэ Гэрээний Ервей номноос үүнийг мөн маш тодорхой харж болно. Ервей номны уншигчиддаа хүргэх гэсэн гайхамшигт үнэт шигтгээ мэт илчлэлт илэрхийллүүдээс хамгийн гол санаа нь Түүний хаан ширээний өмнө айх айдас, эмээлтгүйгээр зоригтойгоор нээлттэйгээр ОЙРТОН оч гэж байгаа мэт. Энэ маань бидний хувьд Есүс Христийн үхэл, амилалтаас болж боломжтой болсон. Учир нь Есүс Христ бид бүгдийн бүх гэм нүглийн цагаатгалыг хийгээд Бурхан Эцэгийнхээ баруун гарт суусан. Бурхан Эцэг биднийг харахдаа Өөрийн Хүүгийн зөвт байдал дотор хардаг. Учир нь Есүс Христ биднийг төлөөлөн Түүний баруун гарт суусан Тэргүүн Тахилч юм. Тиймээс бид Бурхантайгаа хамт алхахад бидний дээр ямарч гэм нүглийн ул мөр байхгүй юм. Учир нь бид үүрд зөвтгөгдсөн. Биднийг Өөртэйгөө алхуулахын тулд Бурхан Өөрийн Хүүгээ өгөхөөс буцаагүй. Та Түүний хувьд тийм их үнэ цэнэтэй. Та Бурхан уруу ойртон ирэхэд өнөөдөр ямар ч саад тотгор үгүй.

Хайрлагдсан хүмүүс ээ, бүгдээрээ Бурхантайгаа улам ойр дотно алхацгаая. Тэгээд бид үргэлж гэм зэмгүй байх болно. Бидний хараа Их Эзэн дээр байгаа цагт бид хэзээ ч буруутгагдахгүй, ямар ч гэм нүглийн толбо мөргүй байх болно. Хараа маань өөр зүйл дээр байх үед гэм нүглийн үр дагавар, хор уршиг, буруутгал, гологдол биднийг нөмөрдөг юм. Тэнгэрлэг Эцэгийнхээ өвөрт ойртон очицгооё. Тэрээр таныг Өөр дээр нь ирэхийг, Өөртэй нь хамт алхахыг хүлээж байна.

БИЕ БИЕНЭЭ ХАЙРЛАЦГААЯ

Бурхан биднийг хайрласан хайраа хэрхэн харуулсан бэ?

Бурхан Өөрийнхөө цорын ганц Хүүг хvн тøрøлхтøнд илгээсэн нь Түүгээр дамжуулан биднийг амьдруулахын тулд юм. Үүгээр Бурханы хайр бидэнд илэрхийлэгдсэн юм. - 1 Иохан 4:9

Тиймээс "Хайрлагдсан хvмvvс ээ, бие биеэ хайрлацгаая. Учир нь хайр бол Бурханаас ирдэг. Хайрладаг хүн бүр Бурханаас төрсөн бөгөөд Бурханыг мэддэг юм.

Хайрладаггүй нэгэн нь Бурханыг мэддэггүй. Учир нь Бурхан бол хайр билээ." - 1 Иохан 4:7-8

ХРИСТИТГЭЛТ ХҮМҮҮС ХАМТДАА

‎"23 Өөрсдийн найдварын хүлээн зөвшөөрлөө гуйвалгүй бат баримталцгаая. Учир нь Амлагч нь итгэмжит билээ. 24 Бие биеэ хайр болон сайн үйлсэд хөхүүлэн урамшуулахад анхааръя.

25 Ингэхдээ зарим хүмүүсийн зуршил болсон шиг хамтран цуглахаа болилгүй, харин нөгөө өдөр ойртож буйг харах тусам бие биеэ зоригжуулъя." Еврей 10-23:25

Одоогоос 10 жилийн өмнөх Христитгэлт амьдралаа эргэн дурсвал итгэгч найз нөхөдтэйгээ байнга уулзаж, нөхөрлөж хамтдаа сайхан цагуудыг өнгөрөөдөг байлаа. Тэр бух уулзалтуудын гол цөм нь бидний Аврагч болоод Их Эзэн Есүс Христ байсан юм. Олон цагаар бид хамтдаа нөхөрлөн байхдаа сайхан хооллож, тоглоом тогтлож, бур шөнөжин хуртэл Есүсийн тухай ярьж, Түүнтэй холбоотой жужиг драмм зохион бие биедээ толилуулж байснаа одоо тодхон санаж байна. Тийм ч учраас бидний сүнслэг өсөлт маш сайн байсан. Хүнд хэцүү байдалд байгаа нэгнийгээ тусалж дэмжиж, нэг нэгнийхээ итгэлийн амьдралаар урам зориг авч, бие биенээ хурцалж явсан сайхан нөхөрлөлүүдээ дурсан санахад одоо Их Эзэндээ талархан байхын сацуу мөн гуниг харуусал сэтгэлд минь торох шиг. Учир нь хамтдаа байсан Их Эзэн доторх сайхан анд нөхөд, ахан дүүсийн маань зарим нь өнөөдөр хамт байхгуй байгаад мөн зарим нь Их Эзэнээсээ холдон явсныг харахад гунигтай... Өнгөрсөн 10аад жилд бид бугдийн амьдралд маш олон зуйл тохиолдсон нь мэдээж. Гэвч амьдралд юу ч тохиолдсон Христитгэлт хүмүүс бид Их Эзэнээсээ зуурсан байх нь чухал. Үүнийг хэрэгжуулэх нэг чухал зүйл нь бид юу ч болж байсан хамтдаа байх.

Дээрх ишлэлд бидний Их Эзэн Итгэмжит учраас өөрсдийн найдварын хүлээн зөвшөөрөл буюу тунхагаа бат баримталцгаая хэмээн биднийг уриалсан байна. Бид хэзээ нэгэн цагт Их Эзэнтэй уулзаж, мөнх амьдрах нь бидэнд байгаа найдвар билээ. Энэхуу найдвараас бид гуйвж болохгуй. Энэ найдвараа алдахгуй, өмнөө байнга байлган бат сахихын тулд бид бие биенээ хайр болон сайн үйлсэд урамшуулахад анхаарч зориудаар хүчин чармайлт гаргах хэрэгтэй гэсэн үг юм. Үүнийг бид хамтдаа байж байж л хэрэгжүүлж чадна. Иймд 25 дугаар ишлэлд нөгөө өдөр ойртож буйг харах тусам хамтдаа цуглаж байхыг уриалсан байна. Учир нь зарим хүмүүс хамтдаа цуглахаа больж энэ нь бүр зуршил болсон байна. Энэ бол харамсалтай явдал. Есүс Христ энэ дэлхийд хоёр дахиа эргэн ирэх өдөр бол нөгөө өдөр юм. Хэдий Библи Их Эзэнийг чухам аль өдөр ямар цагт ирэхийг хэлээгуй ч Түүний ирэхийн өмнөх үеийн шинж тэмдэгүүд урьд урьдынхаас ч илүү одоогийн бидний амьдарч буй цагт илэрхий тод болсон. Иймээс бид хамтдаа цуглах нь амин чухал.

"19 Би та нарт дахин хэлье. Хэрэв та нараас хоёр чинь ямар нэгэн зүйлийг гуйх талаар газар дээр санаа нийлбэл, тэнгэр дэх Миний Эцэг үүнийг чинь тэдний төлөө биелүүлэх болно. 

20 Учир нь хоёр буюу гурван хүн Миний нэрээр хаана цуглана, тэнд Би тэдний дунд байна гэж айлдав." Матай 18:19-20

Бид хамтдаа цуглахад Их Эзэн бидэнтэй хамт байдаг учраас бидний хамтдаа байн нөхөрлөх цаг мөч маш нандин, ер бусын байдаг. Түүний оршихуй юутай ч зүйрлэшгуй, юугаар солишгуй. Тэнд ер бусын амар тайван, баяр хөөр, эдгэрэл, мэргэн ухаан, Ариун Сунсний удирдамж чиглүүлэг бидний төлөө оршин байдаг. Дээрээс нь бид хамтдаа байсан цагт л дээрх Матай 18:19 дүгээр ишлэлийг биелүүлэх, мөн үр дүнг нь харах боломжтой. Тэгэхээр бид хамт байх нь Их Эзэний хүсэл юм. 

"Харин Тэр Өөрөө гэрлийн дотор байдагчлан бид гэрлийн дотор явбал, бид бие биетэйгээ нөхөрлөж, Түүний Хүү Есүсийн цус биднийг бүх нүглээс цэвэрлэдэг ажээ." 1 Иохан 1:7

Хамтдаа байж нөхөрлөхийн бас нэгэн гайхамшигт үнэнийг энд хэлсэн байна. Бидний Эзэн Гэрэл. Бид мөн адил Гэрэл дотор байдаг гэрэл. Үүний илрэл нь бидний хамтдаа нөхөрлөн байгаагаар харагддаг. Ингэж бид гэрлийн дотор явж, бие биентэйгээ нөхөрлөхөд Христийн цус биднийг бүх гэмээс цэвэрлэн угааж байдаг. Үнэхээрийн гайхалтай. 

Анхны чуулган байнга цугладаг байсан. 

"42 Тэд байнга элч нарын сургаалыг сонсож, бас нөхөрлөж, талх хувааж, залбирцгааж байлаа.

46 Өдөр бүр тэд нэг сэтгэлээр сүмд цуглаж, талхаа айлуудад хувааж, баяр хөөртэйгөөр, чин сэтгэлээсээ хооллоцгоон 

47 Бурханыг магтаж, бүх ардын хайр хүндэтгэлийг олж байв. Эзэн тэдэн дээр аврагдагсдын тоог өдрөөс өдөрт нэмэгдүүлж байлаа." Уйлс 2:42, 46-47

Дээрх ишлэлүүд анхны чуулган хэрхэн цугладаг байсныг харуулж байна. Тэд сүмдээ цуглахаас гадна айлуудад буюу нэг нэгнийдээ цуладаг байсан байна. Христийн дагалдагч болох бидний гол уурэг бол бусдыг дагалдагч болгох явдал билээ. Үүнийг бид мөн хамтдаа байж байж л хийж чадна. 47 дугаар ишлэлд 'Эзэн тэдэн дээр аврагсдын тоог өдрөөс өдөрт нэмэгдүүлж байлаа' гэсэн байна. Иймээс Христийн дагалдагчид болох бид эдгээр эцсийн өдрүүдэд Их Эзэнийхээ нэр дээр хамтдаа цуглахаа болилгуй хамтдаа байснаар бие биенээ хайр болон сайн үйлсэд урамшуулан, найдвараа бат баримталцгаая. Ийнхүү Эзэн бидэн дээр аврагсдын тоог өдрөөс өдөрт нэмэх болно. Амен.